വടക്കാഞ്ചേരിയുടെ അഭിമാനമായി “മാമാങ്കം 2018”

കേരളത്തിന്റെ സാസ്കാരിക തലസ്ഥാനമായ ത്രിശൂരിലെ വടക്കാഞ്ചേരിയുടെ അഭിമാന കലാകാരൻമാരെ അനുസ്മരിച്ചു മാമാങ്കം 2018 ദുബായിൽ കൊടിയിറങ്ങി. ഏപ്രിൽ 27 വെള്ളിയാഴ്ച വൈകീട്ട് ദുബായ് ഇന്ത്യൻ അക്കാഡമി സ്കൂളിൽ വച്ച് നടന്ന മാമാങ്കം 2018 എന്ന നൃത്ത കലാസന്ധ്യ , പ്രവാസികളുടെ കണ്ണും മനവും നിറച്ചു കൊണ്ട് മലയാണ്മയുടെ മാരിവില്ലഴക് തീർത്ത് ഗാലറിയ ഇവെന്റ്സുമായി സഹകരിച്ചു വടക്കാഞ്ചേരി സുഹൃത് സംഘത്തിന്റെ നേതൃത്വത്തിൽ അരങ്ങേറി. കലാപരിപാടികൾ ഇന്ത്യൻ വൈസ് കോൺസുലാർ ശ്രീ നിർവാണ് ഉത്ഘാടനം ചെയ്തു, പ്രസിഡന്റ് അഭിലാഷ് കക്കാട്, സെക്രട്ടറി ഹരീഷ് , ട്രഷറർ കൃഷ്ണദാസ് ,മുഖ്യ സംഘാടകരായ പ്രസാദ് പറയിരിക്കൽ , വിനയ് കടമ്പാട്ട് എന്നിവർ നേതൃത്വം നൽകി

വടക്കാഞ്ചേരിയിലെ മണ്മറഞ്ഞ പ്രഗത്ഭരായ മച്ചാട് ഇളയത്, ഭരതൻ, പി എൻ മേനോൻ, ഒടുവിൽ ഉണ്ണികൃഷ്ണൻ, കലാമണ്ഡലം ഹൈദരാലി , ഫിലോമിന , ആറ്റൂർ കൃഷ്ണൻകുട്ടി, വിലാസിനി എന്നിവർക്ക് പ്രണാമം അർപ്പിച്ചുകൊണ്ട് തുടങ്ങി വച്ച നൃത്ത കലാ സന്ധ്യയിൽ , ഭരതൻ , പി എൻ മേനോൻ ചിത്രത്തിലെ ഗാന നൃത്തങ്ങൾ കോർത്തിണക്കി. മലയാളസിനിമയിൽ ഭാവാഭിനയത്തിന്റെ അമ്പതു വർഷം പൂർത്തിയാക്കിയ കെ പി എ സി ലളിതയേയും, 40 വർഷത്തെ ചലച്ചിത്ര സംഗീത സപര്യ പൂർത്തിയാക്കിയ ഔസേപ്പച്ചനെയും വേദിയിൽ പൊന്നാട നൽകി ആദരിച്ചു. അവതാരകനായി ജയരാജ് വാര്യരും ഔസേപ്പച്ചൻ വയലിനിലും ഗായകരായ ലതിക ടീച്ചർ, കല്ലറ ഗോപൻ , എടപ്പാൾ വിശ്വം , ഇന്ദുലേഖ വാര്യർ എന്നിവർ ഗാനങ്ങൾ അവതരിപ്പിച്ചു